Sonetos; Modesto Fraga

NOITES DE SHEREZADE

 Creme cando che digo: "o noso amor                                                                   é un barco no devalo das mareas,                                                                       o aroma que devén das nosas veas                                                                 inzadas de salitre, no solpor".

 Creme cando che digo con fervor                                                                     en medio de arroaces e baleas                                                                           a carón de corais, cunchas e areas                                                                  "canto custa instalarse no amor!". 

 Quixera ser Simbad, aquel mariño                                                           intrépido das mil e unha noites,                                                                     viaxar contigo alén da eternidade;

 quixera camiñar sen que me escoites,                                                         soñar que un día fuches Sherezade                                                                     e o noso amor un cálido aloumiño.

 PEXEGUEIROS EN FLOR

 No tempo dos aromas matutinos                                                                     por mananciais e ríos fun buscarte                                                           percorrín mar e terra ata encontrarte                                                           entre salgueiros e vizosos pinos.

 Pexegueiros en flor, zumes salinos                                                               pétalos deliciosos, flor e arte,                                                                       unha paisaxe enteira para amarte                                                               nesta nudez de cánticos divinos.

 Caen lentas as follas. Sabe a outono                                                                 a seca frouma, cálida ambrosía                                                                       dos corpos que se anhelan vivamente.

 Non quero despertar, prefiro o sono                                                                   a deliciosa chuvia fuxidía                                                                                 que esvara dos teus seos, paixón ardente.

 SE ALGÚN DÍA

 Se algún día nos faltan as palabras                                                                   que falen os silencios e os sentidos,                                                                 as paredes da casa, a vella lámpada                                                                   o vetusto almanaque ou esas fotos

 tinguidas de inocencia en branco e negro,                                                           como aquela canción das nosas vidas                                                                   que sabiamos case de memoria,                                                                           de Pablo Milanés, lembras amor?

 Se algún día nos faltan as palabras                                                           deixemos que nos falen os murmurios,                                                                 os cantos dos paxaros, a chorima,

o mar, o vento, o río, aquelas cousas                                                                que sempre compartimos, o que queda                                                              se algún día nos faltan as palabras.

ADAGIO DE OUTONO 

Eu quédome contigo, co teu sono,                                                                    coa partitura alegre que mereces                                                                          porque despois de todo permaneces                                                                en medio deste adagio neste outono.

Eu quédome contigo e reflexiono                                                                      nas horas compartidas nas que ás veces                                                            sinto que te me vas cando apareces                                                                nas notas musicais das que son dono.

Eu quédome contigo, co teu canto,                                                                    coa melódica voz que se derrama                                                                        e intúo vir, pois sempre vai comigo

como esa tenue luz que adoro tanto;                                                            canda a última canción do pentagrama                                                              sempre e despois, eu quédome contigo.

(Do Mar salgado)

Agora que estás lonxe, amada ausente,                                                                renuncio á potestade do meu verso,                                                                      absorto agardo no silencio inmerso                                                                      como o mencer agarda o novo abrente.

E cando evoco a túa pel inxente                                                                            limada co fervor perseverante                                                                                indaga o meu pensar no teu semblante                                                                para afundirse nel eternamente.

Ou cando os días sen amor fermoso                                                                      resignado entre as sabas desta estancia                                                              ausente amada, amarte é o que reclamo:

Moitas son as noites nas que amoso                                                                      ollándote nos metros da distancia                                                                          renuncias a saber por que te amo.

PROMONTORIO NERIO                                                                                          Que cedo fica a noite e que serodia a aurora!                                                      que fúlxido presente perturba o teu legado:                                                          espida, no baixío, na pel do acantilado                                                                  agardas inherente o beixo fiel de ardora.

E nada te detén, acaso, ardora, ardora                                                                  a penas un recordo, un silencioso fado,                                                                que nace como a cinsa da terra e do pasado;                                                      preludio de silencio, ausencias e demora.

E nin sequera o vento, a eito, repentino                                                                alenta vigoroso preto túa.                                                                                        A chuvia, a néboa, a brisa, o vendaval, a bruma.

Emerxes da venganza coa claridá da lúa                                                              para morrer impune no sangue doutra escuma                                                    que lenta prevalece absorta no seu destino.