Ruído de motos; Kiko Nieves

As cidades están cheas de xente.

Non podes seguir a túa liña.

Tropezas, estórbante, písanche.

E os coches. E o lixo.

As cidades están cheas de merda.

Gústame o cheiro das rúas

o primeiro día de choiva

logo do verán.

Ás portas do mencer.

Cando a merda está ás escuras.

Ou durmindo.

Os mellores momentos das ciudades

-que son poucos, cativos-

sempre son fodidos

polo ruído das motos.

É unha opinión xeneralizada.

No paseo nocturno

pola zona vella

ou na soidade da habitación

sempre aparece.

O ruído das motos.

As unllas contra o cemento.

A cidade enxendra violencia.

Seino.

Vou polas rúas matando xente.

Ao chou.

A ti que me miras.

Ao vello da boina.

Á señora do carriño.

Ao cativo que chora.

O municipal. O taxista.

O da moto das pizzas.

O da moto das pizzas

dúas veces.

Son un asasino en serie.

Executivos, vellas, vendedores da ONCE,

policías, curas.

Non teño piedade.

Todos mortos.

Mais non o saben.

A cidade.