MULLERES GALEGAS POLA IGUALDADE

Hoxe, 8 de marzo de 2021, conmemoramos en Sada o Día Internacional da Muller, día recoñecido pola ONU como unha xornada para reivindicar a igualdade e para facer balance sobre a situación das mulleres na sociedade. É o momento para festexar os avances e loitar pola superación dos atrancos. É o momento de seguir mellorando as condicións da muller. Aínda que o importante é facelo durante os 365 días do ano.

A desigualdade afecta ás mulleres en aspectos como a educación, o mundo profesional e laboral, a política... A igualdade de xénero é un dereito humano fundamental que nos implica a todas e a todos e polo que, independentemente do país no que se viva, se debe loitar.

[...]

É unha grande satisfacción para min que a concellería de Benestar Social e Igualdade do concello de Sada utilizara este traballo para dar a coñecer a moitas galegas que se significaron na loita pola igualdade de xénero dende diversos campos. 

Xosé Anxo Seoane Cao

Na sección relatos atoparás un novo relato de xoanseca publicado no número 21 da revista cultural  Areal. 

Ilustración orixinal de Eduardo Seoane Riveira.

CONTRIBUÍNDO AOS ACTOS DO CENTENARIO

Isaac Díaz Pardo (Santiago de Compostela, 1920 - A Coruña, 2012) é, ao noso parecer e xunto con Castelao, a figura máis sobranceira do século XX no noso país. O seu compromiso con Galiza (como el gustaba dicir) marcou a súa obra e foi o eixo fundamental da súa vida. Traballou arreo para dotar o país dunha infraestrutura cultural digna, propia, que baseándose na tradición modernizase Galicia e servise de base para a recuperación da súa memoria histórica. Segundo Manuel Rivas: "Faría falta un número indefinido de biografías para unha vida que foi un compendio de moitas existencias". Segundo el mesmo: "Son un pesimista activo".

O Castro, Sargadelos, O Laboratorio de Formas, Ediciós do Castro, o IGI, o Museo Carlos Maside..., son as súas grandes obras. Na actualidade algunhas xa foron "liquidadas". Deixar morrer os seus logros, os seus soños, sería como deixar morrer a nosa lingua, o sinal de identidade que mellor nos define como galegos e como nación.

O IES Isaac Díaz Pardo en colaboración coa Concellería de Cultura quere contribuír aos actos de conmemoración do centenario do nacemento de Isaac Díaz Pardo cunha exposición fragmentada en distintas seccións:

• Centenario de Isaac Díaz Pardo:

15 cadros nos que reproducimos un sinxelo perfil biográfico do homenaxeado co obxectivo básico de servir de achegamento inicial á súa persoa e á súa obra.

• Estatuto de Autonomía de Galicia de 1936:

O mozo Isaac foi un grande defensor do Estatuto do 36 e participou activamente na campaña de propaganda. Recuperar a memoria histórica leva consigo, entre outras moitas cousas, ser coñecedor de como se forxou o Estatuto de Autonomía do 36, verdadeiro xermolo do actual de 1981. A exposición consta de oito cadros explicativos.

• A pegada inmensa de Isaac Díaz Pardo:

Sinxela montaxe audiovisual realizada por GallaeciaFilmes na que dunha maneira sintética se recollen imaxes e textos que nos achegan á figura senlleira do protagonista.

• Centenario Isaac Díaz Pardo:

Montaxe audiovisual baseada en distintas aparicións de Díaz Pardo en distintos programas da TVG e no documental dedicado á súa figura dirixido por Xosé Abad.

• Achegamento ao pintor:

Trátase da interpretación dalgunhas das súas obras que o alumnado do IES Isaac Díaz Pardo realizou co gallo da homenaxe que se lle tributou no instituto o 21 de febreiro de 2008.

Xosé Anxo Seoane Cao. Sada, novembro de 2020.

(XA PODES VER AS DÚAS EXPOSICIÓNS NA SECCIÓN "PROXECTOS DIDÁCTICOS")